തേനി: ആന്ധ്രയില്‍ നിന്നും തമിഴ്‌നാട് വഴി ഇടുക്കിയിലേക്ക് ട്രക്കില്‍ കടത്തിയ 1200 കിലോ കഞ്ചാവുമായി മൂന്നുപേരെ പൊലീസ് അറസ്റ്റ് ചെയ്തു. രാമനാഥപുരം ജില്ലയിലെ തങ്കച്ചിമടം അയ്യന്‍തോപ്പ് സ്വദേശി അബൂബക്‌സിദ്ദിക് (35), ചില്ലിപ്പി സ്വദേശികളായ സെല്‍വരാജ് (32), ചിന്നച്ചാമി (25) എന്നിവരാണ് അറസ്റ്റിലായത്.
ആന്ധ്രയില്‍ നിന്ന് തമിഴ്‌നാട്ടിലെ തെക്കന്‍ ജില്ലകളിലേക്ക് ട്രക്കുകളില്‍ കഞ്ചാവ് കടത്തുന്നതായി സൗത്ത് സോണ്‍ ഐ.ജിക്ക് രഹസ്യ വിവരം ലഭിച്ചിരുന്നു. ഇതേ തുടര്‍ന്ന് നടത്തിയ പരിശോധനയിലാണ് കഞ്ചാവ് പിടികൂടിയത്.
മധുര തേനി ഹൈവേയിലൂടെ പോവുകയായിരുന്ന ട്രക്ക് ആണ്ടിപ്പട്ടി ചെക്ക് പോസ്റ്റില്‍ പൊലീസ് തടഞ്ഞുനിര്‍ത്തി പരിശോധന നടത്തി. ഇതില്‍ 40 കിലോ വീതമുള്ള പൊതികളിലാക്കി 1200 കിലോ കഞ്ചാവ് കണ്ടെത്തി.കഞ്ചാവ് പൊതികള്‍ കടത്താന്‍ ഉപയോഗിച്ച ട്രക്ക് ആണ്ടിപ്പട്ടി പൊലീസ് കസ്റ്റടിയിലെടുത്തു.
ആന്ധ്രാപ്രദേശിലെ കാക്കിനാഡ മേഖലയില്‍ നിന്ന് കഞ്ചാവ് എത്തിച്ച് തേനി ജില്ലയിലെ കമ്പം വഴി ഇടുക്കി ജില്ലയില്‍ എത്തിച്ചു വില്‍പ്പന നടത്താനായിരുന്നു പദ്ധതി. അറസ്റ്റിലായ പ്രതികളെ ഉത്തംപാളയം കോടതിയില്‍ ഹാജരാക്കി റിമാന്‍ഡ് ചെയ്തു.
