തിരുവല്ല: പതിനഞ്ചുകാരിയോട് ലൈംഗികാതിക്രമം കാട്ടിയ കേസില്‍ പ്രതിയെ പോലീസ് പിടികൂടി. മഞ്ഞാടി കൊമ്പാടി ആഞ്ഞിലിമൂട്ടില്‍ എ.എസ്.രൂപേഷ് (43) ആണ് പിടിയിലായത്. കഴിഞ്ഞ വര്‍ഷം ജൂണ്‍ അവസാനം മുതല്‍ സെപ്റ്റംബര്‍ ആദ്യ ആഴ്ച വരെയുള്ള കാലയളവില്‍ ഇയാളുടെ വീട്ടിലും വാടകവീട്ടിലും വച്ചാണ് പെണ്‍കുട്ടിയെ ലൈംഗികമായി ഉപദ്രവിച്ചത്. ലൈംഗിക താല്പര്യത്തോടെ സംസാരിക്കുകയും ആരോടെങ്കിലും പറഞ്ഞാല്‍ കൊല്ലുമെന്ന് ഭീഷണിപ്പെടുത്തുകയും ചെയ്തു.
ജില്ലാ ശിശു സംരക്ഷണഓഫീസറുടെ കാര്യമാലയത്തില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ കുട്ടിയുടെ മൊഴി രേഖപ്പെടുത്തിയ പോലീസ് കേസ് രജിസ്റ്റര്‍ ചെയ്ത് പ്രതിക്കായുള്ള അനേ്വഷണം ഊര്‍ജിതമാക്കിയിരുന്നു. തെങ്ങണ ആശാരിപ്പാടിയിലുള്ള വീട്ടില്‍ നിന്നും കസ്റ്റഡിയിലെടുത്തു. വൈദ്യപരിശോധന ഉള്‍പ്പെടെയുള്ള നടപടികള്‍ പൂര്‍ത്തിയാക്കി പ്രതിയെ കോടതിയില്‍ ഹാജരാക്കി.
