പമ്പ: പോലീസ് 2001ല്‍ രജിസ്റ്റര്‍ ചെയ്ത അബ്കാരി കേസില്‍ ഒളിവില്‍ കഴിഞ്ഞുവന്ന പ്രതിയെ ബംഗളുരുവില്‍ നിന്നും പിടികൂടി. മൂഴിയാര്‍ ആങ്ങമൂഴി ആഞ്ഞിലിക്കല്‍ വീട്ടില്‍ കലേഷ് കുമാറി(45)നെയാണ് അറസ്റ്റ് ചെയ്തത്. 2001 ല്‍ അറസ്റ്റിലായ പ്രതി പിന്നീട് കോടതി നടപടികള്‍ക്ക് ഹാജരാകാതെ ഒളിവില്‍ പോകുകയായിരുന്നു. കോടതി നടപടികളില്‍ ഹാജരാകാത്തതിനെ തുടര്‍ന്ന് ഇയാള്‍ക്കെതിരെ ജില്ലാ കോടതി എല്‍.പി വാറന്റ് പുറപ്പെടുവിച്ചു. ജില്ലാ പോലീസ് മേധാവിയുടെ നിര്‍ദ്ദേശപ്രകാരം പ്രതിയെ കണ്ടെത്തുന്നതിലേക്ക് റാന്നി ഡിവൈ.എസ്.പി ആര്‍. ജയരാജിന്റെ മേല്‍നോട്ടത്തില്‍ പ്രത്യേക അന്വേഷണസംഘം രൂപീകരിച്ചിരുന്നു.
പ്രതി വിദേശത്താണെന്ന് കണ്ടെത്തിയതിനെ തുടര്‍ന്ന് ലുക്ക് ഔട്ട് നോട്ടീസ് പുറപ്പെടുവിച്ചു. കഴിഞ്ഞദിവസം ബംഗളൂരു കേമ്പഗൗഡ അന്താരാഷ്ര്ട വിമാനത്താവളത്തില്‍ വന്നിറങ്ങിയ പ്രതിയെ ബ്യൂറോ ഓഫ് എമിഗ്രേഷന്‍ വിഭാഗം തടഞ്ഞുവെച്ച് എയര്‍പോര്‍ട്ട് പോലീസിന് കൈമാറി. വിവരം ലഭിച്ചതനുസരിച്ച് പമ്പ പോലീസ് സ്‌റ്റേഷനില്‍ നിന്നുള്ള പ്രത്യേകഅന്വേഷണ സംഘം അവിടെ എത്തി പ്രതിയെ അറസ്റ്റ് ചെയ്തു. കോടതിയില്‍ ഹാജരാക്കി റിമാന്‍ഡ് ചെയ്തു. പോലീസ് ഇന്‍സ്‌പെക്ടര്‍ സി.കെ.മനോജ്, എസ്.സി.പി.ഓ സൂരജ് ആര്‍. കുറുപ്പ്, സി.പി.ഓ അനു എസ്. രവി എന്നിവരടങ്ങുന്ന സംഘമാണ് അന്വേഷണത്തിന് നേതൃത്വം നല്‍കിയത്.
