പത്തനംതിട്ട: ജില്ലാ പോലീസ് ആസ്ഥാനത്തെ പോലീസ് കണ്‍ട്രോള്‍ റൂമില്‍ അതിഥിയായി എത്തിയ കൂറ്റന്‍ പെരുമ്പാമ്പിനെ വനപാലകര്‍ എത്തി ചാക്കിലാക്കി. ശനിയാഴ്ച രാത്രി ഏഴരയോടെയാണ് മുറിയുടെ മൂലയില്‍ ചുരുണ്ടു കൂടി കിടന്ന വലിയ പെരുമ്പാമ്പിനെ കണ്ടത്. വിവരം അറിയിച്ചതിനെ തുടര്‍ന്ന് വനംവകുപ്പിന്റെ സ്‌ട്രൈക്കിങ് ഫോഴ്‌സ് എത്തി പാമ്പിനെ പിടികൂടി. വൈകിട്ട് ആറര മുതല്‍ കനത്ത മഴ പെയ്തിരുന്നു. ഇതിനിടെയാകാം പാമ്പ് ഉള്ളില്‍ കടന്നതെന്ന് കരുതുന്നു. ഡ്യൂട്ടി എസ്.ഐ പ്രമോദിന്റെ നേതൃത്വത്തിലാണ് പാമ്പിനെ പിടികൂടാനുള്ള ശ്രമം തുടങ്ങിയത്. ജില്ലാ പോലീസ് ആസ്ഥാനത്തിന്റെ പിന്‍ഭാഗം തോടും വയലുമാണ്. ഈ ഭാഗത്ത് നിന്ന് നിരന്തരം പെരുമ്പാമ്പുകളെ പിടികൂടാറുണ്ട്. ഇവിടെ നിന്നാകണം പാമ്പ് ഉളളില്‍ കയറിയത് എന്നു കരുതുന്നു.
