പത്തനംതിട്ട: തമ്മിലടി രൂക്ഷമായ ജില്ലയിലെ കോണ്‍ഗ്രസിനെ രക്ഷിക്കാന്‍ മുതിര്‍ന്ന നേതാവ് രമേശ് ചെന്നിത്തല രംഗത്ത്. ഡി.സി.സി വൈസ് പ്രസിഡന്റ് വെട്ടുര്‍ ജ്യോതിപ്രസാദ് ആണ് ജില്ലയിലെ പാര്‍ട്ടിയില്‍ ഉടലെടുത്തിരിക്കുന്ന അരക്ഷിതാവസ്ഥ ചെന്നിത്തലയെ അറിയിച്ചത്.
അദ്ദേഹം ഡി.സി.സി പ്രസിഡന്റ് പ്രഫ. സതീഷ് കൊച്ചുപറമ്പില്‍, മുതിര്‍ന്ന നേതാക്കളായ പ്രഫ. പി.ജെ.കുര്യന്‍, അഡ്വ. കെ ശിവദാസന്‍ നായര്‍ എന്നിവരുമായി ബന്ധപ്പെട്ട് വിശദാംശങ്ങള്‍ ചോദിച്ചറിഞ്ഞു. കെപിസിസി പ്രസിഡന്റ് കെ.സുധാകരനുമായി വിഷയം ചര്‍ച്ച ചെയ്ത് ഉചിതമായ പരിഹാരം ഉടനടി ഉണ്ടാക്കാനുള്ള ശ്രമത്തിലാണ് ചെന്നിത്തല.
അതിനിടയില്‍ മഹാരാഷ്ട്രയിലെ കോണ്‍ഗ്രസ് പ്രശ്‌നങ്ങള്‍ പരിഹരിക്കുന്നതിന് വേണ്ടി ഹൈക്കമാന്‍ഡ് ചെന്നിത്തലയെ ചുമതലപ്പെടുത്തിയിട്ടുണ്ട്. നാളെ മുംബൈയ്ക്ക് പോകുന്നതിനു മുന്‍പായി ആദ്യഘട്ട ചര്‍ച്ച പൂര്‍ത്തീകരിക്കാന്‍ ആണ് ചെന്നിത്തല ശ്രമിക്കുന്നത്.
