കോഴഞ്ചേരി: വീട്ടിലുള്ളവരുമായി പിണങ്ങി ഒന്നാം നിലയിലെ മുറിയില്‍ കഴിഞ്ഞിരുന്ന ഗൃഹനാഥന്‍ മരിച്ച വിവരം വീട്ടുകാര്‍ അറിയുന്നത് നാലു ദിവസത്തിന് ശേഷം. കോഴഞ്ചേരി ഗ്രാമപഞ്ചായത്ത് ഏഴാം വാര്‍ഡില്‍ പാമ്പാടിമണ്‍ വീട്ടില്‍ അനില്‍കുമാറിന്റെ (55) മൃതദേഹമാണ് നാലാം നാള്‍ ജീര്‍ണിച്ച നിലയില്‍ കണ്ടെത്തിയത്. വീട്ടിലുള്ളവരുമായി പിണങ്ങിയതിനാല്‍ ഒന്നാം നിലയിലെ മുറിയില്‍ അനില്‍ ഒളിച്ചിരിക്കുകയാണെന്നാണ് കരുതിയത്.
നാലാം ദിവസം കയറി നോക്കിയപ്പോള്‍ അടച്ചിട്ട മുറിയില്‍ ജീര്‍ണിച്ച മൃതദേഹമാണ് കണ്ടത്. ദുര്‍ഗന്ധം വമിച്ചിരുന്നില്ലെന്ന് പറയപ്പെടുന്നു. അനിലും
കുടുംബത്തിലുള്ളവരും നിരന്തരമായ അഭിപ്രായ ഭിന്നത നിലനിന്നിരുന്നു.
നിയമപരമായും സുഹൃത്തുക്കള്‍ വഴിയും പലപ്പോഴും ഇത് പരിഹരിക്കാനുള്ള ശ്രമം നടന്നിരുന്നുവത്രേ. ഈ സാഹചര്യത്തിലാണ് അനില്‍ വീടിന്റെ മുകളിലത്തെ നിലയില്‍ കയറി മുറിയടച്ച് കഴിഞ്ഞതെന്നു കരുതുന്നു. ഇത് പലപ്പോഴും പതിവായിരുന്നതിനാല്‍ ആരും മുകളിലെ നിലയിലേക്ക് ശ്രദ്ധിക്കാറുണ്ടായിരുന്നില്ല എന്നും പറയുന്നു. വിഷം കഴിച്ച് ആത്മഹത്യ ചെയ്തതാണെന്നാണ് പോലീസിന്റെ നിഗമനം. ആറന്മുള പോലീസ് അസ്വാഭാവിക മരണത്തിന് കേസെടുത്തു. മൃതദേഹം ചെങ്ങന്നൂരില്‍
പോസ്റ്റുമാര്‍ട്ടത്തിന് ശേഷം വീട്ടുവളപ്പില്‍ സംസ്‌കരിച്ചു.
