പന്തളം: താമസ്ഥലത്ത് കഞ്ചാവ് ശേഖരവുമായി അതിഥി തൊഴിലാളി പിടിയില്‍. പശ്ചിമ ബംഗാള്‍ സിലിഗുഡി സ്വദേശി ദുലാല്‍ ഹുസൈന്‍ (34) ആണ് 360 ഗ്രാം കഞ്ചാവുമായി പോലീസിന്റെ പിടിയിലായത്. ഇയാള്‍ ദിവസങ്ങളായി നിരീക്ഷണത്തിലായിരുന്നു. അടുത്തിടെ കഞ്ചാവുമായി പിടിയിലായ പ്രതിയില്‍ നിന്നും കിട്ടിയ രഹസ്യവിവരത്തിന്റെ അടിസ്ഥാനത്തില്‍ നടത്തിയ നീക്കത്തിലാണ് ഇയാള്‍ കുടുങ്ങിയത്.
ജില്ലാ പോലീസ് മേധാവി സ്വപ്‌നില്‍ മധുകര്‍ മഹാജന്റെ നിര്‍ദേശപ്രകാരം പോലീസ് ഇന്‍സ്‌പെക്ടര്‍ എസ് ശ്രീകുമാറിന്റെ നേതൃത്വത്തില്‍ രൂപീകരിച്ച പ്രത്യേക സ്‌ക്വാഡാണ് അറസ്റ്റ് ചെയ്തത്. കടയ്ക്കാട് ശ്രീകൃഷ്ണസ്വാമിക്ഷേത്രത്തിന് സമീപമുള്ള വീട്ടില്‍ വാടകയ്ക്ക് താമസിച്ചു വരികയാണ് ദുലാല്‍. മേസ്തിരിപ്പണിയുടെ മറവിലായിരുന്നു കഞ്ചാവ് കച്ചവടം.
ഒരു പൊതിക്ക് 500 രൂപ നിരക്കിലാണ് പ്രതി കഞ്ചാവ് കച്ചവടം നടത്തിവന്നത്. താമസിക്കുന്ന ഇടത്തിനു സമീപം കുഴിച്ചിട്ട നിലയിലാണ് കഞ്ചാവ് ശേഖരം കണ്ടെത്തിയത്. പോലീസ് ഇന്‍സ്‌പെക്ടറുടെ നേതൃത്വത്തിലുള്ള പ്രത്യേക സ്‌ക്വാഡില്‍ എസ് ഐ ഗ്രീഷ്മ ചന്ദ്രന്‍, എസ് സി പി ഓമാരായ സഞ്ചയന്‍, ശരത്, സി പി ഓമാരായ അന്‍വര്‍ഷാ, അമീഷ്, രഞ്ജിത്ത് എന്നിവരാണ് ഉള്ളത്.
