കോഴഞ്ചേരി: സ്‌കൂട്ടര്‍ ഓടയിലേക്ക് മറിഞ്ഞ് അക്ഷയ സെന്റര്‍ ജീവനക്കാരി മരിച്ചു. ആര്‍.സി രേഖകള്‍ പ്രകാരം കുറിയന്നൂര്‍ അക്ഷയ സെന്ററിലെ ജീവനക്കാരി ചെങ്ങരൂര്‍ സ്വദേശി എം. സിജി (35) ആണ് മരിച്ചത്. ഇന്ന് പുലര്‍ച്ചെയാണ് കുറിയന്നൂര്‍ അക്വാഡക്ടിന് സമീപം സ്‌കൂട്ടര്‍ കലുങ്കിനോടു ചേര്‍ന്നുള്ള ഓടയില്‍ നാട്ടുകാര്‍ കണ്ടെത്തിയത്. അപകടം നടന്നത് ഇന്നലെ രാത്രിയിലാണെന്ന് കരുതുന്നു. പരുക്കേറ്റ് ചോര വാര്‍ന്ന് മരിച്ചുവെന്നാണ് നിഗമനം. ഇവിടെ നിന്ന് അധികം അകലെയല്ലാതെ വാടകയ്ക്ക് താമസിക്കുകയാണ് സിജി. കുന്നന്താനം ചെങ്ങരൂര്‍ സ്വദേശിനിയാണ്. അപകടം നടന്ന വിവരം പുറംലോകം അറിയാന്‍ വൈകിയതാണ് മരണ കാരണമായിരിക്കുന്നത്.
