പത്തനംതിട്ട: കേടായ ടി.വിയുടെ തകരാര്‍ പരിഹരിച്ചു കൊടുക്കാന്‍ നടപടി സ്വീകരിച്ചില്ലെന്ന പരാതിയില്‍ തിരുവല്ല പിട്ടാപ്പള്ളില്‍ ഏജന്‍സീസ്, സാംസങ് ഇന്ത്യാ ഇലക്‌ട്രോണിക്‌സ് കമ്പനി എന്നിവര്‍ക്കെതിരേ ഉപഭോക്തൃ തര്‍ക്ക പരിഹാര കമ്മിഷന്റെ വിധി.
കുറിയന്നൂര്‍ തോണിപ്പുഴ പുത്തേത്ത് വീട്ടില്‍ പി.സി മാത്യു നല്‍കിയ ഹര്‍ജിയിലാണ് ഉപഭോക്തൃ തര്‍ക്ക പരിഹാര കമ്മിഷന്‍ പ്രസിഡന്റ് ബേബിച്ചന്‍ വെച്ചൂച്ചിറ, അംഗം നിഷാദ് തങ്കപ്പന്‍ എന്നിവര്‍ ചേര്‍ന്ന് വിധി പ്രസ്താവിച്ചത്. 2021 സെപ്റ്റംബര്‍ 12 ന് മാത്യു തിരുവല്ല പിട്ടാപ്പള്ളി ഏജന്‍സീസില്‍ നിന്ന് 66,500 രൂപ വിലയുള്ള സാംസങ് ടി.വി വാങ്ങിയിരുന്നു. 10 മാസം കഴിഞ്ഞപ്പോള്‍ ടി.വി കേടായി. ടി.വി വിറ്റ പിട്ടാപ്പളളില്‍ ഏജന്‍സീസും സര്‍വീസ് ചെയ്യേണ്ട സാംസങ് കമ്പനിയും നന്നാക്കി കൊടുക്കാമെന്ന് വാഗ്ദാനം ചെയ്തിരുന്നു. പക്ഷേ, നന്നാക്കി നല്‍കാന്‍ തയാറായില്ല. ഇതിനെതിരേയാണ് മാത്യു ഉപഭോക്തൃ തര്‍ക്ക പരിഹാര കമ്മിഷനില്‍ ഹര്‍ജി നല്‍കിയത്.
ഇരുകൂട്ടരില്‍ നിന്നും തെളിവെടുത്ത തര്‍ക്ക പരിഹാര കമ്മിഷന്‍ എതിര്‍ കക്ഷികളുടെ ഭാഗത്ത് നിന്ന് വീഴ്ചയുണ്ടായതായി കണ്ടെത്തി. ഒന്നുകില്‍ അതേ വിലയ്ക്കുള്ള ടി.വി നല്‍കണമെന്നും അല്ലാത്ത പക്ഷം ടി.വിയുടെ വിലയായ 66,500 രൂപ, 10,000 രൂപ നഷ്ടപരിഹാരം, കോടതി ചെലവ് 5000 രൂപ എന്നിവ സഹിതം 81.,500 രൂപ നല്‍കണമെന്നാണ് വിധി.
