കൊടുമണ്‍: ഓടിക്കൊണ്ടിരുന്ന സ്‌കൂട്ടറിന് മുകളിലേക്ക് മരം ഒടിഞ്ഞു വീണു. രണ്ടു പേര്‍ക്ക് പരുക്ക്. തിങ്കളാഴ്ച വൈകിട്ട് 5.45 ന് ഒറ്റത്തേക്ക് പിള്ളേര് മുക്കിന് സമീപമാണ് സംഭവം. മുറിഞ്ഞകല്‍ പുഷ്പമംഗലത്ത് ശിശുപാലന്‍, ഭാര്യ ബിന്ദു എന്നിവര്‍ സഞ്ചരിച്ച സ്‌കൂട്ടറിന് മുകളിലേക്കാണ് റബര്‍മരം ഒടിഞ്ഞ് വീണത്. ഇരുവരും സംസാരശേഷി ഇല്ലാത്തവരാണ്. മകളുടെ വിവാഹം വ്യാഴാഴ്ചയാണ് .
ഇതുമായി ബന്ധപ്പെട്ട ആവശ്യത്തിന് അടൂരില്‍ പോയ ശേഷം തിരികെ ചന്ദനപ്പള്ളി കൂടല്‍ റോഡ് വഴി വീട്ടിലേക്ക് പോകവെയാണ് സംഭവം. ഇതു വഴിയുള്ള ഗതാഗതവും ഇതോടെ ഏറെ നേരം തടസപ്പെട്ടു. പ്ലാന്റേഷന്‍ കോര്‍പ്പറേഷന്‍ തോട്ടത്തില്‍ നില്‍ക്കുന്ന മരമാണ് വീണത്. പരുക്കേറ്റ ഇരുവരെയും നാട്ടുകാര്‍ ചേര്‍ന്ന് അടൂരിലെ ആശുപത്രിയിലാക്കി. പ്ലാന്റേഷന്‍ കോര്‍പ്പറേഷന്റെ നിരവധി റബര്‍ മരങ്ങള്‍ റോഡിലേക്ക് ചാഞ്ഞ് നില്‍ക്കുന്നത് യാത്രക്കാര്‍ക്ക് ഭീഷണിയാകുന്നുണ്ട്.
