പമ്പ: നിലക്കല്‍ ബേസ് ക്യാമ്പിനോട് ചേര്‍ന്നുള്ള മാലിന്യസംസ്‌കരണ പ്ലാന്റിന്റെ ഇന്‍സിനേറ്റര്‍ പ്രവര്‍ത്തിപ്പിക്കുന്നതിന് ഉപയോഗിക്കുന്ന എഫ് ഡി ഫാനിന്റെ 3 എച്ച് പി യുടെ 2 മോട്ടോറും ഡീസല്‍ പമ്പ് ചെയ്യുന്നതിനുള്ള ഒന്നര എച്ച് പി യുടെ പമ്പും മോഷ്ടിച്ച കേസില്‍ മൂന്നു യുവാക്കള്‍ അറസ്റ്റില്‍. റാന്നി പെരുനാട് പമ്പാ ത്രിവേണി അട്ടത്തോട് പടിഞ്ഞാറേ കോളനി ഓലിക്കല്‍ വീട്ടില്‍ രജീഷ്(18), കൊന്നമൂട്ടില്‍ വീട്ടില്‍ കണ്ണന്‍ എന്ന് വിളിക്കുന്ന മഹേഷ് ( 24), കൊന്നമൂട്ടില്‍ വീട്ടില്‍ മനു ( 23) എന്നിവരാണ് പമ്പ പോലീസിന്റെ പിടിയിലായത്.
കഴിഞ്ഞ മാസം ആറിനാണ് പ്രതികള്‍ സാധനങ്ങള്‍ മോഷ്ടിച്ചു കടത്തിയത്.
ദേവസ്വം ബോര്‍ഡ് അസിസ്റ്റന്റ് എന്‍ജിനീയര്‍ ആലപ്പുഴ നൂറനാട് ഇടക്കുന്നം അനു നിവാസില്‍ ആര്‍. അനൂപിന്റെ പരാതിപ്രകാരം രജിസ്റ്റര്‍ ചെയ്ത കേസിലാണ് അറസ്റ്റ്. നിലക്കലെ പോലീസിന്റെ സിസി ടീവി ദൃശ്യങ്ങളും മറ്റും പരിശോധിച്ചും, ഇത്തരം കുറ്റകൃത്യങ്ങളില്‍ മുമ്പ് ഉള്‍പ്പെട്ടിട്ടുള്ളവരെയും, അടുത്തിടെ ജയിലുകളില്‍ നിന്നും മോചിതരായ മോഷ്ടാക്കളെ
പ്പറ്റിയും പമ്പ പോലീസ് അന്വേഷണം നടത്തിയിരുന്നു. ജില്ലാ പോലീസ് മേധാവി വി അജിത്തിന്റെ നിര്‍ദേശപ്രകാരം ഊര്‍ജ്ജിതമാക്കിയ അന്വേഷണത്തിലാണ് ഇപ്പോള്‍ പ്രതികള്‍ അറസ്റ്റിലായിരിക്കുന്നത്.
