പത്തനംതിട്ട: പ്രായപൂര്‍ത്തിയാകാത്ത പെണ്‍കുട്ടിയെ കടത്തികൊണ്ടുപോയി ഒരുമാസം കൂടെ താമസിപ്പിച്ച് ബലാല്‍സംഗം ചെയ്ത് ഗര്‍ഭിണിയാക്കിയ പ്രതിക്ക് 20 വര്‍ഷം കഠിന തടവും 2 ലക്ഷം രൂപ പിഴയും ശിക്ഷ. പത്തനംതിട്ട അതിവേഗ സ്‌പെഷ്യല്‍ കോടതി ജഡ്ജി ഡോണി തോമസ് വര്‍ഗീസിന്റെതാണ് വിധി. പുളിക്കീഴ് പോലീസ് 2019 നവംബര്‍ 29 ന് രജിസ്റ്റര്‍ ചെയ്ത കേസിലാണ് വിധി. പൊടിയാടി നെടുമ്പ്രം നടുവിലെ മുറിയില്‍ രാജേഷ് ഭവന്‍ വീട്ടില്‍ രാജേഷി(39)നെയാണ് കോടതി ശിക്ഷിച്ചത്. പ്രോസിക്യൂഷന് വേണ്ടി അഡ്വ റോഷന്‍ തോമസ് കോടതിയില്‍ ഹാജരായി. പോക്‌സോ നിയമത്തിലെ 6, 5 വകുപ്പുകള്‍ പ്രകാരമാണ് ശിക്ഷിച്ചത്. പിഴയടച്ചില്ലെങ്കില്‍ മൂന്ന് മാസം കൂടി കഠിന തടവ് അനുഭവിക്കണം. പിഴത്തുക കുട്ടിക്ക് നല്‍കണം. അന്നത്തെ എസ് ഐ നിസാമുദീന്‍ ആയിരുന്നു കേസ് രജിസ്റ്റര്‍ ചെയ്തത്. പോലീസ് ഇന്‍സ്‌പെക്ടര്‍ ടി രാജപ്പന്‍ അന്വേഷണം പൂര്‍ത്തിയാക്കി കോടതിയില്‍ കുറ്റപത്രം ഹാജരാക്കി. കോടതിനടപടികളില്‍ എ എസ് ഐ ഹസീന സഹായിയായി.
