പത്തനംതിട്ട: പാലക്കാട് കഞ്ചിക്കോട് കൈരളി സ്റ്റീല്‍ കമ്പനിയിലുണ്ടായ പൊട്ടിത്തെറിയില്‍ കൊല്ലപ്പെട്ട അരവിന്ദ് (22) ജോലിക്ക് കയറിയത് 23 ദിവസം മുന്‍പ് മാത്രമാണ്. ഓമല്ലൂര്‍ പഞ്ചായത്ത് ഐമാലി രാമവിലാസത്തില്‍ പി.ടി. പ്രദീഷിന്റെയും എസ്. രാജശ്രീയുടെയും മകനാണ് അരവിന്ദ്. കൈരളി സ്റ്റില്‍സില്‍ എക്‌സകവേറ്റര്‍ ഓപ്പറേറ്റര്‍ എന്ന തസ്തികയില്‍ മേയ് 29 നാണ് ജോലിക്ക് കയറിയത്.
2021 ല്‍ ഐടിഐയില്‍ നിന്ന് 67 ശതമാനം മാര്‍ക്കോടെയാണ് അരവിന്ദ് പഠിച്ച് ഇറങ്ങിയത്. ഇപ്പോള്‍ കിട്ടിയ ജോലി കുടുംബത്തിന്റെ ഏക പ്രതീക്ഷയായിരുന്നു. ജോലിക്ക് കയറിയ സന്തോഷം തീരുന്നതിന് മുന്‍പാണ് അരവിന്ദിന്റെ ജീവന്‍ നഷ്ടമായിരിക്കുന്നത്. ഫര്‍ണസ് പൊട്ടിത്തെറിച്ചാണ് അപകടം ഉണ്ടായത്. മൃതദേഹം കത്തിക്കരിഞ്ഞ നിലയില്‍ ഫര്‍ണസിനുള്ളിലാണ് കണ്ടെത്തിയത്. അരവിന്ദ് എങ്ങനെയാണ് ഫര്‍ണസിനുള്ളില്‍ കുടുങ്ങിയത് എന്നുള്ള കാര്യം വ്യക്തമല്ല.
