റാന്നി: നിയന്ത്രണം നഷ്ടപ്പെട്ട സ്വകാര്യ ബസ് റേഷന്‍ കടയിലേക്ക് ഇടിച്ചു കയറി. ഇന്നലെ വൈകിട്ട് ആറരയോടെ അത്തിക്കയം ജങ്ഷനിലാണ് സംഭവം. ആര്‍ക്കും പരുക്കില്ല. വേഗത കുറവായിരുന്നതിനാലാണ് വലിയ അപകടം ഒഴിവായത്. എരുമേലി-വെച്ചൂച്ചിറ-റാന്നി റൂട്ടില്‍ സര്‍വീസ് നടത്തുന്ന സ്വകാര്യ ബസാണ് അപകടത്തില്‍ പെട്ടത്. ജങ്ഷനിലെ ഇറക്കം ഇറങ്ങി വന്ന ബസ് റോഡരികില്‍ പാര്‍ക്ക് ചെയ്തിരുന്ന ഓട്ടോറിക്ഷയില്‍ ഇടിച്ച ശേഷമാണ് കടയിലേക്ക് ഇടിച്ചു കയറിയത്. സംഭവത്തില്‍ ഇരു വാഹനങ്ങള്‍ക്കും കേടുപാടുകള്‍ സംഭവിച്ചു.
