ശബരിമല: നിലയ്ക്കലിലെ പാര്‍ക്കിങ് ഫീസ് പിരിക്കാനുള്ള കരാര്‍ റദ്ദ് ചെയ്തു. ടെന്‍ഡര്‍ തുക പൂര്‍ണമായും അടയ്ക്കുന്നതില്‍ കരാറുകാരന്‍ വീഴ്ച വരുത്തിയതിനെ തുടര്‍ന്നാണ് ദേവസ്വം ബോര്‍ഡ് കരാര്‍ റദ്ദ് ചെയ്തത്. കൊല്ലം ശൂരനാട് സ്വദേശി സജീവാണ് മൂന്ന് കോടി രൂപയ്ക്ക് പാര്‍ക്കിങ് കരാര്‍ ഏറ്റെടുത്തിരുന്നത്. രണ്ട് കോടി രൂപ ഇയാള്‍ തുടക്കത്തില്‍ അടച്ചിരുന്നു. ബാക്കിയുള്ള ഒരു കോടിയും മറ്റിങ്ങളിലായുള്ള 32 ലക്ഷവും ചേര്‍ത്താണ് അടയ്ക്കാന്‍ ബാക്കിയുള്ളത്.
ഇത് അടയ്ക്കുന്നതിന് സാവകാശം ആവശ്യപ്പെട്ട് കരാറുകാരന്‍ ഹൈക്കോടതിയെ സമീപിച്ചിരുന്നു. തുക അടയ്ക്കുന്നതിന് കഴിഞ്ഞ മൂന്ന് വരെ കോടതി സമയം അനുവദിച്ചു.
മൂന്നാം തീയതിക്ക് ശേഷവും തുക അടക്കുവാന്‍ കരാറുകാരന്‍ തയാറാകാതിരുന്നതിനെ തുടര്‍ന്നാണ് ദേവസ്വം ബോര്‍ഡ് ഇടപെട്ട് കരാര്‍ റദ്ദ് ചെയ്തത്. പാര്‍ക്കിങ്ങ് ഫീസ് പിരിക്കുന്നതടക്കമുളള ചുമതല ചൊവ്വാഴ്ച രാവിലെ മുതല്‍ ദേവസ്വം ബോര്‍ഡ് പൂര്‍ണമായും ഏറ്റെടുത്തതായി പ്രസിഡന്റ് അഡ്വ. കെ. അനന്തഗോപന്‍ പറഞ്ഞു.
