ശബരിമല: തീര്‍ത്ഥാടനകാലത്ത് ആരോഗ്യവകുപ്പ് സന്നിധാനം, പമ്പ, നിലയ്ക്കല്‍, എരുമേലി ഇടത്താവളങ്ങള്‍ എന്നിവിടങ്ങളില്‍ ദേശീയ പ്രാണിജന്യ രോഗനിയന്ത്രണത്തിന്റെ ഭാഗമായി എന്റമോളജിക്കല്‍ പഠനം നടത്തി. മലമ്പനി, മന്ത്, ഡെങ്കിപ്പനി, ചെള്ള് പനി, കുരങ്ങ് പനി, കാല അസാര്‍ തുടങ്ങിയ പ്രാണിജന്യ രോഗങ്ങളുടെ ശാസ്ത്രീയമായ പഠനവും നടന്നു. ലാര്‍വ, അഡല്‍റ്റ് മസ്‌കിറ്റോ കളക്ഷനും അവയുടെ അവലോകനവും അതനുസരിച്ചുള്ള രോഗപ്രതിരോധ ബോധവല്‍ക്കരണവും നടത്തി. ആരോഗ്യവകുപ്പിന്റെ സംസ്ഥാന, പത്തനംതിട്ട ജില്ലാ എന്റമോളജിക്കല്‍ വിഭാഗങ്ങള്‍ സംയുക്തമായിട്ടാണ് പഠനം നടത്തിയത്.
ശബരിമലയില്‍ വിവിധ ഇടങ്ങളില്‍ ഉറവിട നശീകരണം, തെര്‍മല്‍ ഫോഗിങ്, സ്‌പ്രേയിങ് തുടങ്ങിയവയിലൂടെ പ്രാണികളുടെ പ്രജനനം തടഞ്ഞു. സന്നിധാനം ഹെല്‍ത്ത് ഇന്‍സ്‌പെക്ടറുടെ നേതൃത്വത്തില്‍ തീര്‍ത്ഥാടകര്‍ക്കായി വിവിധ ബോധവല്‍ക്കരണ പരിപാടികളും സംഘടിപ്പിച്ചു.
