തിരുവല്ല: പോലീസ് പിടിക്കുമെന്നായപ്പോള്‍ കൈവശം കരുതിയിരുന്ന കഞ്ചാവ് പൊതി വലിച്ചെറിഞ്ഞ് തോട്ടില്‍ ചാടി രക്ഷപ്പെട്ട പ്രതിയെ പോലീസ് പിടികൂടി. തിരുവല്ലയിലും പരിസരങ്ങളിലും കഞ്ചാവ് വില്പന നടത്തിവന്ന ചുമത്ര ആറ്റിന്‍കരയില്‍ വീട്ടില്‍ മോന്‍സി(54)യാണ് ഡാന്‍സാഫ് സംഘത്തിന്റെയും ലോക്കല്‍ പോലീസിന്റെയും സംയുക്ത തെരച്ചിലില്‍ കൊട്ടാലി പാലത്തിനടുത്തുനിന്നും പിടിയിലായത്.
വെള്ളിയാഴ്ചയാണ് പോലീസ് പിന്തുടരുന്നതറിഞ്ഞ പ്രതി പ്ലാസ്റ്റിക് കവറില്‍ സൂക്ഷിച്ച കഞ്ചാവ് വെള്ളത്തില്‍ വലിച്ചെറിഞ്ഞിട്ട് രക്ഷപ്പെട്ടത്. കവറില്‍ നിന്നും 90 ഗ്രാം കഞ്ചാവ് പോലീസ് കണ്ടെടുത്തു. ജില്ലാ പോലീസ് മേധാവി സ്വപ്‌നില്‍ മധുകര്‍ മഹാജന് ലഭിച്ച രഹസ്യവിവരം, നര്‍കോട്ടിക് സെല്‍ ഡി വൈഎസ്പി കെ.എ വിദ്യാധരന് കൈമാറിയതിനെ തുടര്‍ന്നാണ് ഇന്നലെ ഡാന്‍സാഫ് സംഘവും, പോലീസ് ഇന്‍സ്‌പെക്ടര്‍ സുനില്‍ കൃഷ്ണന്റെ നേതൃത്വത്തിലുള്ള തിരുവല്ല പോലീസും ചേര്‍ന്ന് ഇയാളെ അറസ്റ്റ് ചെയ്യാന്‍ നീക്കം നടത്തിയത്.
പോലീസിന്റെ പിടിയില്‍ നിന്നും രക്ഷപ്പെടാനുള്ള ശ്രമത്തിനിടെയാണ് മോന്‍സി തോട്ടില്‍ ചാടിയത്. തിരുവല്ല പോലീസ് ഇന്‍സ്‌പെക്ടര്‍ക്കൊപ്പം എസ് ഐ നിത്യാ സത്യന്‍, എ എസ് ഐ ബിജു എന്നിവരും, ഡാന്‍സാഫ് സംഘത്തില്‍ എ എസ് ഐ അജികുമാറും സി പി ഓ സുജിത്തുമാണ് ഉണ്ടായിരുന്നത്.
