റാന്നി: പെന്‍ഷന്‍ തുക കൊടുക്കാത്തതിന്റെ പേരില്‍ പിതാവിനെ തലയ്ക്കടിച്ച് പരുക്കേല്‍പ്പിച്ച മകനെ പോലീസ് അറസ്റ്റ് ചെയ്തു. പെരുനാട് മാടമണ്‍ കോട്ടൂപ്പാറ പടിഞ്ഞാറേ ചരുവില്‍ വീട്ടില്‍ അരുണ്‍ സത്യനെ(31) യാണ് പോലീസ് പിടികൂടിയത്. തിങ്കളാഴ്ച വൈകിട്ട് അഞ്ചിന് വീട്ടില്‍ വച്ചായിരുന്നു ആക്രമണം.
സ്റ്റീല്‍ കോപ്പയെടുത്തു പിതാവ് സത്യന്റെ (68) തലയ്ക്കടിക്കുകയായിരുന്നു. മനപ്പൂര്‍വമല്ലാത്ത നരഹത്യാ ശ്രമത്തിനാണ് കേസ് എടുത്തത്. പെരുനാട് പോലീസ് സ്‌റ്റേഷനില്‍ 13 കേസിലും റാന്നി, പത്തനംതിട്ട പോലീസ് സ്‌റ്റേഷനുകളില്‍ ഓരോ കേസുകളിലും പ്രതിയാണ് ഇയാള്‍. വീട്ടിലും നാട്ടിലും സ്ഥിരമായി പ്രശ്‌നങ്ങളുണ്ടാക്കുന്ന ഇയാള്‍ പോലീസിനും തലവേദനയാണ്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. പോലീസ് ഇന്‍സ്‌പെക്ടര്‍ രാജീവ് കുമാറിന്റെ നേതൃത്വത്തില്‍ എസ്.ഐ വിജയന്‍ തമ്പി, സി പി ഓമാരായ വിനീഷ്, സുജിത്, ഹരിദാസ് എന്നിവരടങ്ങിയ സംഘമാണ് പ്രതിയെ പിടികൂടിയത്.
