പത്തനംതിട്ട: കെട്ടിട നിര്‍മാണം നടക്കുന്ന സ്ഥലത്ത് കാപ്പാ പ്രതിയുടെ നേതൃത്വത്തില്‍ ഗുണ്ടാവിളയാട്ടം. വിവരമറിഞ്ഞ് അന്വേഷിക്കാന്‍ ചെന്ന എസ്‌ഐയെയും പൊലീസുകാരനെയും ഗുണ്ടാസംഘം മര്‍ദിച്ചു. അഞ്ചു പേരെ അറസ്റ്റ് ചെയ്തു.
പ്രക്കാനം ഓവില്‍പ്പീടിക സ്വദേശികളായ കാപ്പാകേസ് പ്രതി ശേഷാ സെന്‍, സുഹൃത്തുക്കളായ രാഹുല്‍, ജിതിന്‍, അശോക്, രാധാകൃഷ്ണന്‍ എന്നിവരാണ് പിടിയിലായത്. പ്രക്കാനം കൈതവനപ്പടിയില്‍ തിങ്കളാഴ്ച രാവിലെ 11 നായിരുന്നു സംഭവം. സുരേഷ് എന്നയാള്‍ കരാറെടുത്ത കെട്ടിട നിര്‍മാണ സ്ഥലത്തായിരുന്നു പ്രതികളുടെ അക്രമം. സുരേഷിന്റെ പരാതി പ്രകാരം പട്രോളിങ് ഡ്യൂട്ടിയിലായിരുന്ന ഇലവുംതിട്ട സ്‌റ്റേഷനിലെ എസ്.ഐമാരായ ശശിധരന്‍, അനില്‍, എസ്.സി.പി.ഓ സുധിലാല്‍, സി.പി.ഓ അരുണ്‍ എന്നിവര്‍ സ്ഥലത്ത് ചെന്നു.
പ്രശ്‌നം പരിഹരിക്കാന്‍ ശ്രമിച്ച ഉദ്യോഗസ്ഥരെ പ്രതികള്‍ അസഭ്യം വിളിച്ചു. എസ്.ഐ ശശിധരനും സി.പി.ഓ അരുണിനും മര്‍ദനമേറ്റു. വിവരമറിഞ്ഞ് കൂടുതല്‍ പോലീസ് എത്തിയാണ് പ്രതികളെ കസ്റ്റഡിയില്‍ എടുത്തത്. ശേഷാ സെന്‍ മറ്റൊരു കേസില്‍ ജാമ്യത്തില്‍ ഇറങ്ങിയിട്ട് മൂന്നാഴ്ചയാകുന്നതേയുള്ളൂ. പരുക്കേറ്റ പോലീസ് ഉദ്യോഗസ്ഥര്‍ കോഴഞ്ചേരി ജില്ലാശുപത്രിയില്‍ ചികില്‍സ തേടി.
