അടൂര്‍: പതിനാല് വര്‍ഷം മുന്‍പ് പിതാവിനെയും സുഹൃത്തിനെയും വെട്ടിക്കൊലപ്പെടുത്തിയ കേസിലെ പ്രതിയായ യുവാവ് സ്വന്തം സഹോദരനെ വെട്ടിക്കൊല്ലാന്‍ ശ്രമിച്ചുവെന്ന കേസില്‍ അറസ്റ്റില്‍. ചൂരക്കോട് രാജ് ഭവനില്‍ ശ്രീരാജ്(34) ആണ് അറസ്റ്റിലായത്. സഹോദരന്‍ അനുരാജി(35)നെയാണ് വെട്ടിയത്. പൊലീസ് അടൂര്‍ ജനറല്‍ ആശുപത്രിയില്‍ പ്രവേശിപ്പിച്ചെങ്കിലും പരുക്ക് ഗുരുതരമായതിനാല്‍ പിന്നീട് കോട്ടയം മെഡിക്കല്‍ കോളേജ് ആശുപത്രിയിലേക്ക് മാറ്റി.
ബുധനാഴ്ച പുലര്‍ച്ചെ ഒന്നിനാണ് സംഭവം. സഹോദരങ്ങള്‍ തമ്മില്‍ വീട്ടിലുണ്ടായ തര്‍ക്കമാണ് ആക്രമണത്തില്‍ കലാശിച്ചത്. 2009-ല്‍ അച്ഛന്‍ സദാശിവന്‍ പിള്ളയെയും ഇദ്ദേഹത്തിന്റെ സുഹൃത്ത് പ്രസന്നകുമാറിനെയും വെട്ടിക്കൊലപ്പെടുത്തിയ കേസിലെ പ്രതിയാണ് ശ്രീരാജ്. മാതാവിനെ ദേഹോപദ്രവം ഏല്‍പ്പിച്ചതിന് 2021 ല്‍ ഇയാള്‍ക്കെതിരെ അടൂര്‍ പൊലീസ് സ്റ്റേഷനില്‍ കേസുണ്ട്.
കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. പോലീസ് ഇന്സ്പെക്ടര് ശ്രീകുമാര്‍, എസ്.ഐ മനീഷ് എന്നിവരുടെ നേതൃത്വത്തിലുള്ള അന്വേഷണസംഘമാണ് പ്രതിയെ പിടികൂടിയത്.
