ക്രിക്കറ്റില്‍ 111 എന്ന സംഖ്യ നെല്‍സണ്‍ നമ്പര്‍ എന്നാണ് അറിയുന്നത്. ബാറ്റിങ് ടീമിന്റെ സ്‌കോര്‍ 111 ല്‍ എത്തിയാല്‍ നെല്‍സണ്‍ എന്ന് കമന്റേറ്റര്‍മാര്‍ പറയുന്ന പതിവുണ്ട്. ആ നെല്‍സണ്‍ നമ്പര്‍ തന്റെ പുതിയ പുസ്തകത്തിന്റെ തലക്കെട്ട് ആക്കിയിരിക്കുകയാണ് പത്തനംതിട്ട ജില്ലാ സി ബ്രാഞ്ച് എസ്.ഐ സജീവ് മണക്കാട്ടുപുഴ.
സുഹൃത്തുക്കള്‍ക്കും മറ്റും ശുഭദിനാശംസകള്‍ അയക്കുമ്പോള്‍ അതതു ദിവസത്തെ പ്രാധാന്യം കൂടി മനസ്സിലാക്കി അതുമായി ചേര്‍ത്ത് കുറിപ്പ് തയാറാക്കി അയക്കുന്ന ശീലത്തില്‍ നിന്നാണ് ഈ പുസ്തകത്തിന്റെ പിറവി കുറിക്കപ്പെട്ടതെന്ന് സജീവ് പറയുന്നു. ഒരുവര്‍ഷം മുഴുവന്‍ ഇത്തരത്തില്‍ ആശംസകള്‍ അയക്കുന്നത് തുടര്‍ന്നപ്പോള്‍, അടുത്ത ഒരു വര്‍ഷം കൊണ്ട് ഓരോ ദിവസത്തെയും വിഷയാധിഷ്ഠിതമോ വ്യക്ത്യധിഷ്ഠിതമോ ആയ വിശേഷങ്ങള്‍ ആഴത്തില്‍ പഠിക്കുകയും രേഖപ്പെടുത്തിവയ്ക്കുകയും പിന്നീട് ഫോണില്‍ ടൈപ്പ് ചെയ്ത് സൂക്ഷിക്കുകയും ചെയ്തു. പലയിടങ്ങളില്‍ നിന്നും ശേഖരിച്ച തത്സംബന്ധിയായ അറിവുകള്‍ ക്രോഡീകരിച്ചപ്പോഴേക്കും രണ്ടുവര്‍ഷം കഴിഞ്ഞിരുന്നു.
2021 ല്‍ തുടങ്ങിയ സപര്യ 2023 ആദ്യമോടെ ഏതാണ്ട് പൂര്‍ത്തിയാകുകയും, പിന്നീട് ഏകീകൃതഭാവത്തില്‍ ക്രമീകരിക്കുന്ന പ്രവൃത്തിയില്‍ ഏര്‍പ്പെടുകയും ചെയ്തു. ദിനവിശേഷകുറിപ്പുകള്‍ ഉള്‍പ്പെട്ട ആശംസകള്‍ സാമൂഹിക
മാധ്യമങ്ങളിലൂടെ വായിച്ചറിഞ്ഞ പ്രിയസുഹൃത്തുക്കളില്‍ ചിലര്‍, ഈ ശേഖരം പുസ്തകമാക്കിയാല്‍ വളരെ നന്നായിരിക്കുമെന്നും എല്ലാവര്‍ക്കും പ്രയോജനപ്പെടുമെന്നും അഭിപ്രായപ്പെട്ടപ്പോള്‍, ആയതു മുഖവിലയ്‌ക്കെടുത്ത് അതിനുള്ള ഉദ്യമം ആരംഭിക്കുകയായിരുന്നു. പുസ്തകമാക്കാനുള്ള ശ്രമത്തില്‍ പരമാവധി ദിനവിശേഷങ്ങള്‍ ഉള്‍പ്പെടുത്തിയെങ്കിലും ഒരുപാട് പേജുകളുള്ള വലിയൊരു പുസ്തകമാകുമെന്ന തിരിച്ചറിവുള്‍ക്കൊണ്ട്, 111 എണ്ണത്തിലേക്ക് ചുരുക്കിയാണ് ഇപ്പോള്‍ പുസ്തകരൂപത്തിലാക്കിയിരിക്കുന്നത്. അറിവ് തേടുന്നവര്‍, വിദ്യാര്‍ത്ഥികള്‍, മത്സരപ്പരീക്ഷകളില്‍ പങ്കെടുക്കുന്നവര്‍ തുടങ്ങി എല്ലാവിഭാഗം ആളുകള്‍ക്കും പ്രയോജനപ്പെടുംവിധം തയാറാക്കിയ’111 ദിനവിശേഷങ്ങള്‍ ‘ എന്ന് പേരിട്ട ഈ പുസ്തകം ഏറെനാളത്തെ കഠിനപ്രയത്‌നത്തിന്റെ ഫലമാണ്. കോഴിക്കോട് തിങ്ക്‌ലി പബ്ലിഷേഴ്‌സ് ആണ് പ്രസാധകര്‍.
സജീവ് മണക്കാട്ടുപുഴയുടെ രണ്ടാമത്തെ പുസ്തകമാണ് ഇത്. ആദ്യത്തേത് 2021 ഒക്ടോബറില്‍ പ്രസിദ്ധീകരിച്ച ‘ കല്ലുപെന്‍സില്‍ ‘ എന്ന പേരിലുള്ള കഥാസമാഹാരമാണ്. സംസ്ഥാനത്തെ പോലീസ് ഉദ്യോഗസ്ഥരുടെ തെരഞ്ഞെടുത്ത കഥകള്‍ ഉള്‍പ്പെടുത്തി പുറത്തിറങ്ങിയ ‘ സല്യൂട്ട് ‘, ‘ പരേഡ് ‘ എന്നീ കഥാസമാഹാരങ്ങളിലും സജീവിന്റെ കഥകള്‍ ഉണ്ടായിരുന്നു. സി ബി ഐ ബുള്ളറ്റിനിലെ പഠനലേഖനം ഉള്‍പ്പെടെ നിരവധി ശ്രദ്ധേയമായ സൃഷ്ടികള്‍ സജീവിന്റെതായിട്ടുണ്ട്. ആനുകാലികങ്ങളില്‍ കഥകളും കവിതകളും ലേഖനങ്ങളും എഴുതിവരുന്നു. ആകാശവാണി തിരുവനന്തപുരം നിലയത്തില്‍ കഥകളും മറ്റും അവതരിപ്പിക്കാറുണ്ട്. പത്രപ്രവര്‍ത്തനത്തില്‍ പരിശീലനം നേടിയശേഷം പോലീസ് സേനയിലെത്തിയ സജീവ്, ആറു വര്‍ഷത്തിലധികമായി ജില്ലാ പോലീസ് മീഡിയ സെല്ലിന്റെ ചുമതല വഹിച്ച് പോലീസ് വാര്‍ത്തകള്‍ തയാറാക്കിവരുന്നു. മികച്ച റിപ്പോര്‍ട്ടിങിനും സര്‍ഗ്ഗസൃഷ്ടികളുടെ പേരിലും നിരവധി തവണ ജില്ലാ പോലീസ് മേധാവിമാരുടെ സല്‍സേവന പത്രം കരസ്ഥമാക്കിയ സജീവ്, സാഹിത്യമേഖലയില്‍ മറ്റ് പുരസ്‌കാരങ്ങളും നേടിയിട്ടുണ്ട്. ഇപ്പോള്‍ പത്തനംതിട്ട ജില്ലാ ക്രൈം ബ്രാഞ്ചില്‍ എസ് ഐ ആണ്. കൊല്ലം ജില്ലയിലെ പത്തനാപുരം സ്വദേശിയാണ്.
