തൃശൂര്‍: സംസ്ഥാനത്ത് 1042 പേര്‍ എയ്ഡ്‌സ് ബാധിതരെന്നു കണ്ടെത്തി. കഴിഞ്ഞ 10 മാസത്തിനുള്ളിലെ കണക്കാണിത്. 797 പുരുഷന്മാരും 240 സ്ത്രീകളും ഒമ്പത് ട്രാന്‍സ്‌ജെന്‍ഡേഴ്‌സുമടക്കമുള്ളവരാണ് രോഗബാധിതര്‍. 1354874 പേരില്‍ നടത്തിയ പരിശോധനയിലാണ് ഇത്ര പേര്‍ക്ക് രോഗം സ്ഥിരീകരിച്ചിരിക്കുന്നതെന്ന് ഡി.എം.ഒ. ടി.പി. ശ്രീദേവി പറഞ്ഞു.
ജില്ലയില്‍ ഇതുവരെ 2937 പേരാണ് എയ്ഡ്‌സ് ബാധിതരായി ചികിത്സയിലുള്ളത്. കഴിഞ്ഞ 10 മാസത്തിനുള്ളില്‍ തൃശൂര്‍ ജില്ലയില്‍ എയ്ഡ്‌സ് ബാധിച്ച് മരിച്ചത് 38 പേര്‍. കഴിഞ്ഞ വര്‍ഷം 63 പേരാണ് മരിച്ചത്. മുന്‍ വര്‍ഷങ്ങളെ അപേക്ഷിച്ച് മരണ നിരക്ക് കുറവാണെങ്കിലും രോഗികളുടെ എണ്ണത്തില്‍ വലിയ കുറവ് സംഭവിക്കുന്നില്ലെന്ന് കണക്കുകള്‍ സൂചിപ്പിക്കുന്നു.
കഴിഞ്ഞ വര്‍ഷം 157 പേര്‍ക്ക് രോഗം സ്ഥിരീകരിച്ചപ്പോള്‍, ജനുവരി മുതല്‍ ഒക്ടോബര്‍ വരെയുള്ള കണക്ക് പ്രകാരം 103 പേര്‍ എച്ച്.ഐ.വി. പോസിറ്റീവ് ആണെന്ന് കണ്ടെത്തിയതായും ഡി.എം.ഒ. പറഞ്ഞു.
