ലോകകപ്പില്‍ കനത്ത തിരിച്ചടി നേരിട്ട പാകിസ്ഥാന്‍ തിരിച്ചു വരവിന് ഒരുങ്ങുന്നു. ഓസ്‌ട്രേലിയക്കെതിരായ ടെസ്റ്റ് പരമ്പരയ്ക്കുളള പാകിസ്ഥാന്‍ ടീമിനെ പ്രഖ്യാപിച്ചു. ഷാന്‍ മസൂദ് നായകനായ 18 അംഗ ടീമിനെയാണ് പ്രഖ്യാപിച്ചിരിക്കുന്നത്. ഡിസംബര്‍ 14 മുതല്‍ ജനുവരി ഏഴുവരെയാണ് മൂന്ന് മത്സരങ്ങളടങ്ങിയ ടെസ്റ്റ് പരമ്പര.
ബാബര്‍ അസം നായക സ്ഥാനത്ത് നിന്നും പടിയിറങ്ങിയ ശേഷമുളള ആദ്യത്തെ പരമ്പരയാണിത്. ലോകകപ്പിലെ മോശം പ്രകടനത്തെ തുടര്‍ന്നാണ് ബാബര്‍ അസം സ്ഥാനം ഒഴിഞ്ഞത്. ബാബര്‍ ടീമില്‍ അംഗമാണ്.
ഇടം കൈയ്യന്‍ ഓപ്പണര്‍ സൈ അയ്യൂബ്, പേസ് ബൗളര്‍ കുറം ഷഹ്‌സാദ് എന്നിവര്‍ക്ക് ഇതാദ്യമായി പാക് ടീമിലേക്ക് വിളി വന്നിട്ടുണ്ട്. ഫഹീം അഷ്‌റഫ്, മിര്‍ ഹംസ, മുഹമ്മദ് വസീം ജൂനിയര്‍ എന്നിവര്‍ ടെസ്റ്റ് ടീമിലേക്ക് തിരിച്ചെത്തിയിട്ടുണ്ട്.
