ആര്‍.എസ്. വിമല്‍ എന്ന ചലച്ചിത്രകാരന്‍ ഇന്നലെകളുടെ കഥ പറയുന്നയാളാണ്. ‘എന്ന് നിന്റെ മൊയ്തീന്‍’ എന്ന ചിത്രത്തിന്റെ വന്‍ വിജയത്തിനു ശേഷം വിമല്‍ തിരക്കഥ രചിച്ച് നിര്‍മ്മിക്കുന്ന പുതിയ ചിത്രമാണ് ശശിയും ശകുന്തളയും. എഴുപതുകളിലെ പാരലല്‍ കോളജ് അന്തരീക്ഷത്തിലാണ് ചിത്രമൊരുക്കുന്നത്.
നവാഗതനായ ബച്ചാള്‍ മുഹമ്മദ് സംവിധാനം ചെയ്യുന്നു. കൊല്ലങ്കോട്, ചിറ്റൂര്‍, പാലക്കാട് എന്നിവിടങ്ങളിലായി ചിത്രീകരണം പൂര്‍ത്തിയായ സിനിമ എഴുപതു കാലഘട്ടത്തിന്റെ പശ്ചാത്തലത്തിലൂടെ രണ്ടു ട്യൂട്ടോറിയല്‍ കോളജുകളുടെ പരസ്പര കലഹവും പ്രണയവും ഇതിവൃത്തമാക്കുന്നു.
പുതുമുഖങ്ങളായ ഷാഹിന്‍, ആമി എന്നിവര്‍ കേന്ദ്ര കഥാപാത്രങ്ങളെ അവതരിപ്പിക്കുന്ന ചിത്രത്തില്‍ സിദ്ദിഖ്, ബാലാജി ശര്‍മ്മ, അശ്വിന്‍ കുമാര്‍, ബിനോയ് നമ്പ്യാല, സൂര്യ കൃഷ്ണ എന്നിവരും അഭിനയിക്കുന്നു.
ആമി ഫിലിംസിന്റെ ബാനറില്‍, ആര്‍.എസ്. വിമല്‍, സലാം താലിക്കാട്ട്, നേഹ എന്നിവര്‍ നിര്‍മ്മിക്കുന്ന ചിത്രം അടുത്തമാസം പ്രദര്‍ശനത്തിനെത്തുന്നു.
സംഗീതം-പ്രകാശ് അലക്‌സ്, പശ്ചാത്തല സംഗീതം-കെ. പി., ഛായാഗ്രഹണം-വിഷ്ണുപ്രസാദ്, എഡിറ്റിംഗ് -വിനയന്‍ എം. ജെ.,
കലാസംവിധാനം-വസന്ത് പെരിങ്ങോട്, മേക്കപ്പ്-വിപിന്‍ ഓമശ്ശേരി, കോസ്റ്റ്യും ഡിസൈന്‍-കുമാര്‍ എടപ്പാള്‍, സംഘട്ടനം-അഷറഫ് ഗുരുക്കള്‍, പി.ആര്‍.ഒ-വാഴൂര്‍ ജോസ്, സ്റ്റില്‍സ്-ഷിബി ശിവദാസ്.
