പത്തനംതിട്ട: വനിതാ പോലീസ് ഉദ്യോഗസ്ഥരുടെ കുറവ് ജില്ലയിലെ പോലീസ്
സ്‌റ്റേഷനുകളുടെ പ്രവര്‍ത്തനത്തെ പ്രതികൂലമായി ബാധിക്കുന്നു. പമ്പ, മൂഴിയാര്‍ സ്‌റ്റേഷനുകളില്‍ നിലവില്‍ വനിതാ പോലീസ് ഉദ്യോഗസ്ഥര്‍ ഇല്ലാത്ത സ്ഥിതിയാണുള്ളത്. സ്ത്രീ പീഡന, പോക്‌സോ കേസുകള്‍ വര്‍ധിച്ച് വരുന്ന സാഹചര്യത്തില്‍ വനിതാ പോലീസുകാരുടെ സേവനം ഓരോ സ്‌റ്റേഷനിലും അത്യാവശ്യമാണെന്നിരിക്കെ അവരുടെ എണ്ണത്തിലുള്ള കുറവ് ജില്ലയിലെ പോലീസ് സ്‌റ്റേഷനുകളുടെ പ്രവര്‍ത്തനത്തെ ഏറെ പ്രതികൂലമായി ബാധിച്ചിട്ടുണ്ട്.
105 വനിതാ പൊലീസുകാര്‍ വേണ്ട സ്ഥാനത്ത് 87 പേര്‍ മാത്രമാണ് ജില്ലയിലുള്ളത്. വനിതാ സെല്ലിലും വനിതാ പൊലീസ് സ്‌റ്റേഷനിലും വനിതാ ഉദ്യോഗസ്ഥരുടെ കുറവ് ദൈനംദിന പ്രവര്‍ത്തനങ്ങളെ പ്രതികൂലമായി ബാധിക്കുന്നുണ്ടെന്ന് അധികൃതര്‍ പറയുന്നു. നിലവിലെ സാഹചര്യത്തില്‍ വനിതാ പൊലീസ് ഉദ്യോഗസ്ഥര്‍ക്ക് ജോലി ഭാരവും സമ്മര്‍ദ്ദവും താങ്ങാവുന്നതിലും അപ്പുറമാണെന്ന് പരാതിയുണ്ട്.
പലര്‍ക്കും അവധി എടുക്കാന്‍ കഴിയാത്ത സാഹചര്യമാണുള്ളത്. സംസ്ഥാനത്ത് 60000 പോലീസ് ഉദ്യോഗസ്ഥരുള്ളതിന്റെ 10 % മാത്രമാണ് വനിതകള്‍. ട്രെയിനിങ് പൂര്‍ത്തിയാക്കുന്ന വനിതാ പൊലീസ് ഉദ്യോഗസ്ഥര്‍ മറ്റ് ജില്ലകളിലേക്ക് പോകുന്നതും പത്തനംതിട്ടയില്‍ വനിതാ പൊലീസിന്റെ എണ്ണം കുറയുന്നതിന് കാരണമാകുന്നുണ്ട്. ജില്ലയിലെ വനിതാ പൊലീസ് ഉദ്യോഗസ്ഥരുടെ കുറവ് പരിഹരിക്കണമെന്നാവശ്യപ്പെട്ട് പോലീസ് അസോസിയെഷന്‍ ഉള്‍പ്പടെയുള്ള സംഘടനകള്‍ ഡിജിപിക്ക് പരാതി നല്‍കിയെങ്കിലും യാതൊരു നടപടിയും ഉണ്ടായിട്ടില്ല.
പമ്പ, മൂഴിയാര്‍ എന്നിവ വനമേഖലയിലുള്ള സ്‌റ്റേഷനുകള്‍ ആയതിനാല്‍ ഇവിടെ പുരുഷ പൊലീസുകാര്‍ മാത്രമാണുള്ളത്. ശബരിമല തീര്‍ഥാടന കാലത്ത് സ്‌പെഷല്‍ ഡ്യൂട്ടിക്കായി വനിതകളെ നിയോഗിക്കുമെന്ന് മാത്രം.
