കോന്നി: നിര്‍ത്തിയിട്ടിരുന്ന കെ.എസ്.ആര്‍.ടി.സി ബസ് നേരെ ഉരുണ്ട് റോഡിന് എതിര്‍ ദിശയിലെ ഹോട്ടലിലേക്ക് ഇടിച്ചു കയറി. വലിയ അപകടം ഒഴിവായി. കെ.എസ്.ആര്‍.ടി.സി ഓപ്പറേറ്റിങ് സെന്ററില്‍ നിര്‍ത്തിയിട്ടിരുന്നതാണ് ബസ്.
സ്റ്റാര്‍ട്ടിങ്ങില്‍ ഹാന്‍ഡ് ബ്രേക്കിട്ട് നിര്‍ത്തിയിരുന്ന കെ.എസ്.ആര്‍.ടി.സി ബസ് താഴേക്ക് ഉരുണ്ട് പോവുകയായിരുന്നു. കോന്നി-ഊട്ടുപാറ സര്‍വീസ് നടത്തുന്ന ബസാണ് ഉരുണ്ട് പോയത്. നടപ്പാതയിലെ കൈവരിയും ഇലക്ട്രിക് പോസ്റ്റും ഇടിച്ചിട്ട വാഹനം ഹോട്ടലിന്റെ മുന്‍വശത്തെ ക്യാബിനും തകര്‍ത്താണ് നിന്നത്. സംസ്ഥാനപാത മറികടന്നാണ് ബസ് റോഡിന് മറുവശത്തേക്ക് പോയത്. കെ എസ് ആര്‍ ടി സി ബസിന്റെ മുന്‍വശത്തെ ചില്ല് ഉടയുകയും ചെയ്തു. തിരക്കേറിയ പുനലൂര്‍-മൂവാറ്റുപുഴ സംസ്ഥാന പാതയിലൂടെയാണ് ബസ് ഉരുണ്ട് നീങ്ങിയത്. ഈ സമയം റോഡിലൂടെ മറ്റ് വാഹനങ്ങള്‍ ഇല്ലാതിരുന്നതാണ് അപകടം ഒഴിവാക്കിയത്. ബസ് വരുന്നത് കണ്ട് ചിലര്‍ ഓടി മാറി.
