ബാലയും സൂര്യയും ഏറെ നാളുകള്‍ക്ക് ശേഷം ഒന്നിക്കുന്ന വണങ്കാന്‍ സിനിമ അനിശ്ചിത്വത്തില്‍. ബാല തിരക്കഥ തിരുത്തിയതില്‍ പ്രതിഷേധിച്ച് സൂര്യ പ്രൊജക്ടില്‍ നിന്ന് പിന്മാറി. പിന്നാലെ മലയാളത്തില്‍ നിന്നുള്ള മമിത ബൈജുവും സിനിമ വിട്ടു.
സിനിമയില്‍ താനും സൂര്യയുമായുള്ള കോമ്പിനേഷന്‍ സീനുകള്‍ ഉണ്ടായിരുന്നുവെന്ന മമിത പറയുന്നു. 40 ദിവസത്തോളം ഷൂട്ട് ചെയ്തതിനു ശേഷമാണ് സിനിമ നിന്നുപോയത്. ഡേറ്റിലെ പ്രശ്‌നങ്ങളെ തുടര്‍ന്നാണ് താന്‍ സിനിമയില്‍ നിന്ന് പിന്മാറിയത് എന്നാണ് മമിത പറയുന്നത്.
‘ആ സിനിമയില്‍ നിന്ന് ഞാന്‍ പിന്‍വാങ്ങി. സൂര്യ സാറും പ്രൊഡക്ഷനും ആ സിനിമ ഡ്രോപ് ചെയ്തിരുന്നു. ഞാനും സൂര്യ സാറും തമ്മിലുള്ള കോമ്പിനേഷന്‍ സീനുകളുണ്ട്. ഇനി ആ സിനിമയ്ക്ക് ഒരു ഫ്രഷ് സ്റ്റാര്‍ട്ടാണ് അവര്‍ ഉദ്ദേശിക്കുന്നത്. വീണ്ടും എഗ്രിമെന്റ് മാറേണ്ടി വരും. എനിക്ക് വീണ്ടും അത്രയും തന്നെ ദിവസങ്ങള്‍ പോവും. എനിക്കത്രയും ദിവസങ്ങള്‍ കളയാനില്ല. കോളജുണ്ട്. വേറെ പടങ്ങള്‍ കമ്മിറ്റ് ചെയ്തിട്ടുമുണ്ട്. അതുകൊണ്ടാണ് ചിത്രത്തില്‍ നിന്നും മാറേണ്ടി വന്നത്.’ മമിത പറഞ്ഞു.
18 വര്‍ഷത്തിന് ശേഷമായിരുന്നു് സൂര്യയും ബാലയും ഒരു ചിത്രത്തിന് വേണ്ടി ഒന്നിച്ചത്. അഥര്‍വയെ വച്ച് സിനിമ പൂര്‍ത്തീകരിക്കാനാണ് നീക്കം.
