പത്തനംതിട്ട: റാന്നി പെരുനാട്ടില്‍ ഒരു വ്യക്തിയുടെ വീടിനും വാഹനങ്ങള്‍ക്കും തീ പിടിച്ചു കത്തി നശിച്ചതില്‍ ദുരൂഹത. പെരുനാട് പേഴുമ്പാറ രാജ്ഭവനം രാജ്കുമാറിന്റെ വീടിനും വാഹനത്തിനുമാണ് വെള്ളിയാഴ്ച പുലര്‍ച്ചെ ഒരു മണിയോടെ തീ പിടിച്ചത്. ഒരു മാസം മുന്‍പ് റോഡരികില്‍ പാര്‍ക്ക് ചെയ്തിരുന്ന ഇദ്ദേഹത്തിന്റെ കാറും കത്തി നശിച്ചിരുന്നു.
വെള്ളിയാഴ്ച പുലര്‍ച്ചെ വീടും മുറ്റത്തിരുന്ന ബൈക്കും കത്തിനശിക്കുമ്പോള്‍ ആരും അവിടെയുണ്ടായിരുന്നില്ല. മണ്ണെണ്ണ ഒഴിച്ചതിന് ശേഷം തീ കൊളുത്തുകയായിരുന്നു. വീട് ഭാഗികമായും മുറ്റത്തിരുന്ന ബൈക്ക് പൂര്‍ണമായും കത്തി നശിച്ചു. രാജ്കുമാറും അമ്മയും മാത്രമാണ് വീട്ടില്‍ താമസം. ഇവര്‍ സഹോദരിയുടെ ആറന്മുളയിലെ വീട്ടിലായിരുന്നു.
വീട് കുത്തി തുറന്നു വീട് മുഴുവന്‍ മണ്ണെണ്ണ തളിച്ചാണ് തീ ഇട്ടത്. രാജ്കുമാര്‍ പേഴുംപാറ ജങ്ഷനില്‍ ടിവി റിപ്പയറിങ് കട നടത്തുകയാണ്. കഴിഞ്ഞ മാര്‍ച്ചിലാണ് ഇദ്ദേഹത്തിന്റെ കാര്‍ റോഡരുകില്‍ കത്തി നശിച്ചത്. ഷോര്‍ട്ട് സര്‍ക്യൂട്ട് കാരണമാണ് കത്തിയതെന്ന് അന്ന് രാജ്കുമാര്‍ സംശയം പ്രകടിപ്പിച്ചിരുന്നു. വീടിനും വാഹനത്തിനും ഉണ്ടായ തീ ഫയര്‍ഫോഴ്‌സ് എത്തി അണച്ചു. പോലീസ് സ്ഥലത്തെത്തി നടപടി സ്വീകരിച്ചു. വീടിനുള്ളിലെ കിടക്കകളും ഫര്‍ണിച്ചറുകളും കത്തിനശിച്ചിട്ടുണ്ട്.
