പത്തനംതിട്ട: സുഹൃത്തിനോട് വീഡിയോ എടുക്കാന്‍ ആവശ്യപ്പെട്ട ശേഷം യുവാവ് പാലത്തില്‍ നിന്ന് നദിയിലേക്ക് ചാടി. അരികിലോമീറ്ററോളം മാറി വള്ളിപ്പടര്‍പ്പില്‍ പിടിച്ചു കിടന്ന ഇയാളെ രക്ഷപ്പെടുത്തി. കോന്നി തണ്ണിത്തോട് എലിമുള്ളുംപ്ലാക്കല്‍ മാംകീഴില്‍ വീട്ടില്‍ ശോഭയുടെ മകന്‍ അഖില്‍ എന്നു വിളിക്കുന്ന സുധി (19) ആണ് മുണ്ടോമൂഴി പാലത്തില്‍ നിന്നും കല്ലാറിലേക്ക് ചാടിയത്. ബുധന്‍ വൈകിട്ട് മൂന്നിനാണ് സംഭവം. മഴ പെയ്തു കൊണ്ടിരിക്കുമ്പോഴാണ് സുധി ആറ്റിലേക്ക് ചാടിയത്. ഫയര്‍ ഫോഴ്‌സ്, സ്‌കൂബ ടീം എന്നിവര്‍ ഉള്‍പ്പെടെയുള്ള സംഘം തെരച്ചില്‍ നടത്തുമ്പോഴാണ് അര കിലോമീറ്റര്‍ മാറി കല്ലാറ്റില്‍ പേരുവാലി എന്ന സ്ഥലത്തിനടുത്ത് വള്ളിപ്പടര്‍പ്പില്‍ പിടിച്ച് കിടക്കുന്നതായി കണ്ടെത്തിയത്. ഇയാളെ രക്ഷപ്പെടുത്തി കോന്നി താലൂക്ക് ആശുപത്രിയിലേക്ക് കൊണ്ടുപോയി. ഇയാള്‍ സുരക്ഷിതനാണ്.
